فنکاروں کی فلاح وبہبود حکومتی ذمے داری ہے شرمیلا فاروقی

بزرگ اور غریب فنکار ہمارے ملک کا سرمایہ ہیں،مستحق فنکاروں کی مدد اور بحالی حکومتی ذمے داری ہے، سندھ حکومت یہ احسن طریقے سے نبھارہی ہے۔

ان خیالات کا اظہار وزیراعلیٰ سندھ کی معاون خصوصی برائے ثقافت شرمیلا فاروقی نے محکمہ ثقافت میں انڈوومنٹ فنڈ بورڈ کے اجلاس میں منتخب مستحق فنکاروں میں تقسیم چیک کی تقریب سے خطاب میں کیا انھوں نے کہا کہ انڈوومنٹ فنڈ کے دسویں اجلاس میں کل 252 مستحق فنکاروں میں ایک کروڑ41 لاکھ 20 ہزار روپے تقسیم کیے جا رہے ہیں جبکہ انڈوومنٹ فنڈ بورڈ کے نویں اجلاس میں150غریب و مستحق فنکاروں، ادیبوں اور شاعروں کو منتخب کیا گیا تھا جن میں 78 لاکھ10ہزارروپے تقسیم کیے جا رہے ہیں۔




دسویں اجلاس میں102مستحقین کو بورڈ کی متفقہ رائے سے منتخب کیا گیا ہے جن میں 63 لاکھ 10ہزار روپے تقسیم کیے جا رہے ہیں، تقریب میں بتایا گیا کہ نویں اجلاس کے57 اور دسویں اجلاس کے48 فنکاروں کا تعلق کراچی سے ہے، معاون خصوصی برائے ثقافت شرمیلا فاروقی نے فنکاروں میں چیک تقسیم کیے تقریب میں فنکاروں کی بڑی تعداد نے شرکت کی اندرونِ سندھ کے فنکاروں کو ان کے چیک بذریعہ ڈاک ارسال کر دیے گئے اس موقع پر فنکاروں نے محکمہ ثقافت کی جانب سے کی جانے والی کاوشوں کو سراہا۔