نرخ بڑھنے سے ایل پی جی غریبوں کی دسترس سے باہر

مائع پیٹرولیم گیس ایل پی جی قیمت میں ہوشربا اضافے کے باعث کم آمدنی کے حامل طبقے کی دسترس سے باہر ہوگئی۔

ایکسپریس نیوز کے مطابق ایل پی جی کی قیمتوں میں متعدد بار اضافہ ہوچکا ہے، رواں سال کے دوران فی کلو گرام ایل پی جی کی قیمت میں مجموعی طور 100 روپے کاریکارڈ اضافہ ہوگیا جس کے نتیجے میں فی کلو گرام ایل پی جی کی قیمت 80روپے سے بڑھ کر 180روپے کی بند ترین سطح تک پہنچ گئی ہے۔


ایل پی جی ڈسٹری بیوٹرز ایسوسی ایشن کے چئیرمین عرفان کھوکھر نے بتایا کہ ہمسایہ ملک صارفین کو عالمی قیمت سے 60 فیصد رعایتی قیمت پر ایل پی جی فراہم کرتا ہے، وزیراعظم عمران خان سے گزارش ہے کہ وہ اس ایندھن کو پس ماندہ اور دور دراز علاقوں کے غریب صارفین کی دسترس میں لانے کے لیے اس کی درآمد پر تمام ٹیکسوں کی چھوٹ دینے کے احکامات جاری کریں۔

انہوں نے بتایا کہ ایل پی جی کے مقامی صارفین سے اربوں روپے مالیت کے ٹیکسوں کی وصولیاں کی جارہی ہے۔