عامر کو اپنے رویے پر ہربھجن سنگھ سے معذرت کرنا چاہیےسعید اجمل

سعید اجمل نے کہا ہے کہ محمد عامر کو اپنے رویے پر ہربھجن سنگھ سے معذرت کرنا چاہیے۔

ویب سائٹ www.cricketpakistan.com.pkکو انٹرویو میں سعید اجمل نے کہاکہ ہربجھن سنگھ اور شعیب اختر کی بات چل رہی تھی، محمد عامر کو درمیان میں نہیں آنا چاہیے تھا،کھلاڑیوں کو ایک دوسرے کے ساتھ اچھے انداز میں پیش آنا چاہیے،محمد عامر کو ہربھجن سنگھ سے معذرت کرنا چاہیے۔


ایک سوال پر سعید اجمل نے کہا کہ ورلڈکپ میں پاکستان کی کارکردگی پر خوشگوار حیرت ہوئی،گذشتہ 2 سال میں ایسا وقت بھی آیا جب ٹیم بنانا مشکل نظر آتا تھا،عام طور پر ہم اگر مگر کے چکر میں رہتے ہیں،اس بار غیر معمولی کارکردگی کی بدولت آسانی سے سیمی فائنل میں جگہ بنائی،آصف علی نے اچھا تاثر چھوڑا ہے مگر کارکردگی میں تسلسل کیلیے انھیں مزید بہتری لانا ہوگی۔

یاد رہے کہ ٹی ٹوئنٹی ورلڈکپ میں بھارت کی شکست کے بعد سوشل میڈیا پر محمد عامر نے ہربھجن سنگھ سے کہا تھا کہ پاجی ٹی وی تو نہیں توڑا، جواب میں سابق بھارتی اسپنر نے کہا تھا کہ اب تم بھی بولو گے، بحث چھڑی تو محمد عامر کو اسپاٹ فکسنگ کیس میں سزا یافتہ ہونے اورپیسے کے پیچھے بھاگنے کا طعنہ بھی مل گیا،دونوں طرف سے حملے ہوئے۔