نیویارک میں مسلم طلبا کے لئے عیدین کے موقع پر تعطیل کا اعلان

شہر کے نو منتخب میئر نے عیدالفطر اور عیدالاضحی ٰ کے موقع پر تعلیمی اداروں میں مسلمان طلبا کے لئے سرکاری تعطیل کا اعلان کیا ہے۔

نیو یارک میں ہونے والی ایک تقریب سے خطاب کے دوران نو منتخب میئر ڈی بلازیو نے کہا کہ انہوں نے اپنی انتخابی مہم کے دوران شہر میں آباد مسلم امریکیوں سے کچھ دعوے کئے تھے، اب وقت آگیا ہے کہ مسلم برادری سے کئے گئے ان وعدوں میں سے ایک کو فوری طور پر پورا کیا جائے۔ جس کے تحت اب شہر کے تعلیمی اداروں میں پڑھنے والے مسلم طلبا کو عید الفطر اور عید الاضحیٰ کےموقع پر ایک روزہ تعطیل دی جائے گی۔ نیویارک کے محکمہ تعلیم نے بھی میئر کے اعلان کی تصدیق کی ہے تاہم اس کے اطلاق کے لئے پہلے ضروری قانون سازی کی جائے گی۔

واضح رہے کہ نیویارک میں مسیحی اور یہودی مذاہب سے تعلق رکھنے والے بچوں کو ان کے مذہبی تہواروں پر اسکول سے سرکاری طور پر تعطیلات ملتی ہیں، شہر میں آباد مسلم برادری کی جانب سے کافی عرصے سے اپنے بچوں کے لئے سرکاری طور پر چھٹی کا مطالبہ کیا جاتا رہا ہے۔