کراچی فیکٹری میں آتشزدگی کے سانحے پرصوبے میں آج سوگ کااعلان

گورنرسندھ ڈاکٹرعشرت العباد نے فیکٹری میں آتشزدگی کے سانحے پرصوبے میں آج سوگ کااعلان کیا ہے۔

گورنرسندھ ڈاکٹرعشرت العباد نے اپنے تعزیتی بیان میں کہاہے کہ جاں بحق ہونے والوں کے ورثاسے اظہارتعزیت کے لئے یوم سوگ کا اعلان کرتے ہیں، گورنرنےواقعہ کانوٹس لیتے ہوئے وزارت داخلہ سے فیکٹری مالکان کے نام ایگزٹ کنٹرول لسٹ میں شامل کرنے کی بھی سفارش کی ہے ۔

ایم کیو ایم کے رہنما فاروق ستار نے فیکٹری کے دورہ کے موقع پر میڈیا سے گفتگو کرتے ہوئے کہا کہ ورثاء کے لواحقین کو یقین دلاتا ہوں انہیں انصاف ملے گا ، اور اس حادثے میں ملوث لوگوں کے خلاف ضرور کاروائی کی جائے گی، انہوں نے کہا فیکٹری مالکان صرف لوگوں کو روزگار فراہم نہ کریں بلکہ انکے جان و مال کی حفاظت کو بھی یقینی بنائیں۔

اس موقع پر صوبائی وزیرعبدلروف صدیقی نے میڈیا سے گفتگو کرتے ہوئے کہا کہ فیکٹری مالکان جاں بحق ہونے والے ملازمین کوفی کس 5،5 لاکھ روپے اورزخمیوں کو 2،2 لاکھ روپے معاوضہ اداکریں ،ایک ہفتے میں معاوضہ نہیں دیاتوفیکٹری نیلام کردی جائے گی ۔