کراچی میں لڑکی سے دست درازی کرنے والا موٹرسائیکل سوار اوباش نوجوان گرفتار

شہرقائد کے علاقے اورنگی ٹاؤن میں موٹرسائیکل سوار اوباش نوجوان نے لڑکی کے ساتھ دست درازی کی جس پر پولیس نے کارروائی کرتے ہوئے ملزم کو گرفتار کرلیا۔

ایکسپریس نیوز کے مطابق اورنگی ٹاؤن میں خاتون کے ساتھ بدسلوکی کا واقعہ پیش آیا، واقعے کی سی سی ٹی وی فوٹیج بھی وائرل ہوگئی، واقعہ چند روز قبل پیش آیا تھا۔

فوٹیج میں دیکھا جاسکتا ہے کہ ایک سنسان گلی سے موٹر سائیکل سوار گزر رہا ہے کہ اس دوران اس نے وہاں سے گزرنے والی ایک لڑکی کے ساتھ چلتی موٹر سائیکل پر ہی نازیبا حرکت کی جس پر لڑکی چند لمحے کے لیے حواس باختہ ہوگئی۔


واقعے کے بعد موٹر سائیکل سوار ملزم فرار ہوگیا لیکن سی سی ٹی وی کیمروں میں اس کی فوٹیج محفوظ ہوگئی۔

پولیس حکام نے جائے وقوعہ کا تعین کرکے اورنگی ٹاؤن کے مختلف تھانوں میں ملزم کی تصویر اور فوٹیج فراہم کردیں جس کے نتیجے میں پولیس ملزم کو گرفتار کرنے میں کامیاب ہوگئی۔ پولیس نے ملزم کے خلاف مقدمہ درج کرکے کارروائی کا آغاز کردیا۔