لاہور میں نامعلوم افراد کی فائرنگ سے لیگی رہنما کا بیٹا زخمی

پنجاب کے دارالحکومت میں مسلم لیگ (ن) کے سینئر رہنما طارق بٹ کے بیٹے پر نامعلوم افراد نے اندھا دھند فائرنگ کی جس میں وہ شدید زخمی ہوگیا۔

ایکسپریس نیوز کے مطابق لاہور کے علاقے مانگا منڈی میں مسلم لیگ ن کے سینئر رہنما اور چیئرمین طارق بٹ کے صاحبزادے اسامہ بٹ کو شدید زخمی حالت میں اسپتال پہنچایا گیا۔


عینی شاہد نے بتایا کہ ملزمان فائرنگ کے بعد چیئرمین طارق بٹ کے بیٹے کو خون میں لت پت چھوڑ کر موقع سے باآسانی فرار ہوئے، جس کے بعد ایک راہ گیر نے ریسکیو حکام کو واقعے کی اطلاع دی جس کے بعد رضاکاروں نے زخمی کو مقامی اسپتال منتقل کیا۔ ریسکیو ذرائع کے مطابق اسامہ بٹ کو تین گولیاں لگیں، جس کے باعث اُن کا خون زیادہ بہہ گیا۔

اطلاع ملنے پر مانگا منڈی پولیس بھی موقع پر پہنچی اور شواہد اکھٹے کر کے واقعے کی تحقیقات شروع کردی۔ پولیس حکام کو ملنے والی ابتدائی معلومات میں یہ بات سامنے آئی کہ اسامہ کی کسی سے تلخ کلامی ہوئی تھی۔