مذاکراتی کمیٹیوں کے ارکان کا طالبان کی جنگ بندی کے اعلان کا خیرمقدم

حکومت اور طالبان کی جانب سے مذاکرات کرنے والی کمیٹیوں کے ارکان نے طالبان کی جانب سے جنگ بندی کے اعلان کا خیر مقدم کرتے ہوئے اسے خوش آئند قرار دیا ہے۔

ایکسپریس نیوز کے مطابق حکومتی کمیٹی کے کوآرڈینیٹر عرفان صدیقی کا کہنا ہے کہ دونوں کمیٹیوں کے درمیان مذاکراتی عمل کے تعطل کے وقت فوری جنگ بندی کامطالبہ کیا گیا تھا، طالبان کی جانب سے جنگ بندی کااعلان مثبت اقدام ہے تاہم طالبان کی طرف سےجنگ بندی کی باضابطہ تفصیلات کا انتظار ہے۔ انہوں نے کہا کہ کئی ہفتوں کے تعطل کے باوجود حکومتی کمیٹی بدستور قائم ہے جو طالبان کےاعلان پرغور کرے گی۔


حکومتی کمیٹی کے ایک اور رکن رستم شاہ مہمند کا کہنا تھا کہ حکومت طالبان کے جنگ کےاعلان کا باضابطہ طورپر جائزہ لے گی، وہ سمجھتے ہیں کہ جنگ بندی پر فوری عمل درآمد ہونا چاہئے اور حکومت کی جانب سے بھی حکومت کو اس کا مثبت جواب دیا جائے۔

دوسری جانب طالبان کمیٹی کے رکن مولانا یوسف شاہ نے کہا کہ ملک میں امن کے لئے تمام تر وسائل اور ذرائع کو استعمال میں لایا جائے گا، انہوں نے قوم سے اور جلد خوشخبری کا وعدہ کیا تھا جو وہ آج پورا کررہے ہیں جب کہ مدینہ منورہ میں موجود طالبان مذاکراتی کمیٹی کے سربراہ مولانا سمیع الحق نے بھی جنگ بندی کے اعلان کو خوش آئند قراردیا ہے۔