پاک سری لنکا ویمنز سیریز میچ آفیشلز کا اعلان کردیا گیا

کراچی:
پاکستان کرکٹ بورڈ (پی سی بی) نے 24 مئی سے شروع ہونے والی پاکستان بمقابلہ سری لنکا ویمنز سیریز کے لیے میچ آفیشلز کا اعلان کردیا۔

پاکستان کرکٹ بورڈ کے جاری کردہ اعلامیے کے مطابق پاک سری لنکا ویمنز سیریز کے لیے خواتین ٹیموں کے مابین ٹی20 اور ون ڈے انٹرنیشنل سیریز کے تمام میچز ساؤتھ اینڈ کلب کراچی میں کھیلے جائیں گے۔


آصف یعقوب، فیصل آفریدی، امتیاز اقبال اور عمران جاوید اس سیریز میں آن فیلڈ امپائرز کی ذمہ داریاں نبھائیں گے جبکہ ٹی20 انٹرنیشنل سیریز کے لیے علی نقوی جبکہ ون ڈے انٹرنیشنل سیریز کے لیے جاوید ملک کو میچ ریفری مقرر کیا گیا ہے۔

واضح رہے کہ سیریز میں شرکت کے لیے مہمان ٹیم 19 مئی کو پاکستان پہنچے گی، ٹی20 سیریز میں شامل تین میچز 24، 26 اور 28 مئی جبکہ آئی سی سی ویمنز چیمپئن شپ میں شامل 3 ون ڈے انٹرنیشنل میچز یکم، 3 اور 5 جون کو کھیلےجائیں گے۔