بین اسٹوکس نے گراہم تھارپ کے نام والی شرٹ پہن لی

انگلینڈ کے نئے کپتان بین اسٹوکس نے بطور ٹیسٹ کپتان پہلے میچ کے موقع پر گراہم تھارپ کے نام والی شرٹ پہن لی۔

جب وہ نیوزی لینڈ سے لارڈز ٹیسٹ کیلیے ٹاس کیلیے آئے تو انھوں نے گراہم تھارپ کے نام والی شرٹ پہنی ہوئی تھی جس پر 564 کا ہندسہ بھی درج تھا۔ سابق انگلش بیٹر گذشتہ ماہ کافی بیمار رہے اور تب سے ہی اسپتال میں زیر علاج ہیں۔


اسٹوکس کا کہنا تھا کہ سب کو معلوم ہے کہ تھارپ اس وقت اسپتال میں ہیں، میں نے ان کی اہلیہ سے بات کی ہے، میری یہ جرسی پوری ٹیم کی جانب سے عظیم سابق کرکٹر کے لیے محبت اور سپورٹ کی علامت ہے، ہم اس مشکل وقت میں ان کی اہلیہ بچوں اور دوسرے فیملی ممبران کے ساتھ ہیں۔

یاد رہے کہ انگلینڈ کی 100 ٹیسٹ اور 82 ون ڈے میچز میں نمائندگی کرنے والے تھارپ انگلینڈ کے 2010 سے 2022 تک بیٹنگ کوچ بھی رہے تاہم آسٹریلیا میں ایشز سیریز میں 4-0 سے مات کے بعد انھوں نے عہدہ چھوڑ دیا تھا۔