پاکستان کے چار کھلاڑیوں کی ایشین جونیئر اسکواش چمپیئن کے کوارٹر فائنل تک رسائی

تھائی لینڈ میں جاری 29 ویں ایشین جونیئر اسکواش چیمپئین شپ میں پاکستان کے چار کھلاڑیوں نے کوارٹر فائنلز میں جگہ بنالی،دیگر چار میل اور تمام فی میل کھلاڑیوں کا سفر دوسرے دن ہی ختم ہوگیا۔


ایکسپریس نیوز کے مطابق پتایا میں کھیلی جانے والی جونئیراسکواش چیمپئین شپ کے بوائز انڈر 13 ایونٹ کے دوسرے راونڈ میں احمد خلیل نے بھارت کے آگستیا ہنسال کو 24 منٹ کے مقابلے میں 0-3 سے مات دے کر کوارٹر فائنل میں رسائی حاصل کرلی، نعمان خان نے بھی اپنے حریف کو ناکامی سے دوچار کیا۔

ٹورنامنٹ کے بوائز انڈر 15 میں مبین خان اور بوائز انڈر 19 میں نور زمان نے کامیابی سمیٹ لی، تاہم بوائز انڈر 15 میں اذان خان، عبداللہ نواز، بوائز انڈر 17 میں عثمان ندیم اور انڈر 19 میں انس بخاری شکست کھا گئے، گرلز انڈر 15 میں لوزیا آفتاب اور آمنہ ملک، گرلز انڈر 17 میں مہوش خان اور ثنا بہادر جبکہ گرلز انڈر19 میں مریم ملک کا بھی چیمپئین شپ میں سفر ختم ہوگیا،واضح رہے کہ چیمپئین شپ میں 144 ممالک کے 200 کھلاڑی شریک ہیں۔