ایشیا کپ کافائنل نہ جیتنے کا افسوس ہے مصباح الحق

قومی کرکٹ ٹیم کے کپتان مصباح الحق کا کہنا ہے کہ ٹیم نے اپنی جانب سے پوری کوشش کی لیکن انہیں ایشیا کپ کافائنل نہ جیتنے کا افسوس ہے۔


ایشیا کپ میں شرکت کے بعد وطن واپسی پر میڈیا سے بات کرتے ہوئے قومی ٹیم کے کپتان کا کہنا تھا کہ ایشیا کپ کے اہم مقابلوں میں ہماری فیلڈنگ اچھی نہیں تھی اور کئی اہم مواقع پر کیچز ڈراپ ہوئے، اس کا مطلب یہ نہیں کھلاڑی فیلڈنگ میں بہتری کے لئے محنت نہیں کرتے، انہوں نے ہر میچ میں خوب جان لڑائی۔ روایتی حریف بھارت اور بنگلہ دیش سے میچز جیتنے پر کھلاڑی خوب لطف اندوز ہوئے۔ فائنل میں کچھ کیچز ڈراپ کرنا بھی شکست کی وجہ بنی جس کا ان سمیت تمام کھلاڑیوں کو افسوس ہے۔

مصباح الحق کا کہنا تھا کہ بنگلا دیش کادورہ آسان نہیں تھا، سست وکٹوں کی وجہ سے فاسٹ بالرز کو بہت محنت کرنی پڑی۔ وہ خود اپنی کارکردگی سے مطمئن نہیں۔ بدقسمتی سے دو میچز میں رن آؤٹ ہونے کی وجہ سے انہیں جس طرح کی کارکردگی پیش کرنا تھی وہ نہ دکھا سکے۔ انہوں نے کہا کہ ٹی20 ورلڈ کپ سے پہلے شاہد آفریدی سمیت بلے بازوں کا فارم میں آنا خوش آئند ہے۔ کھلاڑیوں کی پرفارمنس کو دیکھتے ہوئے انہیں ٹی 20 ورلڈ کپ میں پاکستان کی جیت کے امکانات روشن نظر آتے ہیں۔