اسکواش عامر اطلس نے فرحان زمان کا قصہ تمام کردیا

انٹرنیشنل سرکٹ ون اسکواش ٹورنامنٹ کے سیمی فائنل میں عامر اطلس خان نے سیکنڈ سیڈ فرحان زمان کا قصہ تمام کردیا، ٹائٹل اپنے نام کرنے کیلیے جمعے کو ٹاپ سیڈ ناصر اقبال سے مقابلہ کریں گے جو رائونڈ 4 میں دانش اطلس خان کیخلاف سرخرو رہے۔


تفصیلات کے مطابق پنجاب اسکواش کمپلیکس لاہور میں جاری 15 ہزار ڈالر کی خطیر انعامی رقم کے حامل ایونٹ کے پہلے سیمی فائنل میں ٹاپ سیڈ ناصر اقبال نے دانش اطلس خان کو باآسانی 3-0 سے مات دی، دونوں کھلاڑیوں کے مابین 52 منٹ تک جاری رہنے والے مقابلے میں فاتح کھلاڑی نے پہلا گیم 11-8 سے جیتا، دوسرے میں بھی ناصر اسی مارجن سے کامیاب ہوئے، تیسرے گیم میں ٹاپ سیڈ کھلاڑی نے 11-7 سے کامیابی حاصل کرتے ہوئے فائنل میں قدم رکھ دیا جہاں پر ان کا سامنا عامر اطلس خان سے ہوگا۔

وہ فائنل فور میچ میں سخت مقابلے کے بعد سیکنڈ سیڈ فرحان زمان کو 68 منٹ کی جدوجہد کے بعد 3-2 سے قابو کرنے میں کامیاب رہے، پہلے گیم میں عامر نے 11-7 سے کامیابی حاصل کی دوسرا فرحان نے اسی مارجن سے اپنے نام کرتے ہوئے مقابلہ برابر کردیا، تیسرے گیم میں ایک بار پھر عامر 11-6 سے کامیاب ٹھہرے ، فرحان نے ایک بار پھر کم بیک کرتے ہوئے 11-7 سے کامیابی پاتے ہوئے مقابلہ برابر کردیا۔ آخری گیم میں دونوں کھلاڑیوں کے مابین گھمسان کی جنگ ہوئی لیکن قسمت نے عامر کا ساتھ دیا اور وہ 19-17 سے سرخرو ہوگئے۔ فیصلہ کن معرکہ جمعے کی سہ پہر 3 بجے کھیلا جائیگا۔