مڈل آرڈر کی مسلسل ناکامی باعث تشویش ہے بابر اعظم

قومی ٹیم کے کپتان بابر اعظم نے کہا ہے کہ مڈل آرڈر کی مسلسل ناکامی پر تشویش ہے اور اب اس مسئلے پر بات کریں گے۔

انگلینڈ کے ہاتھوں ٹی 20 سیریز کے فیصلہ کن میچ میں شکست کے بعد میڈیا سے گفتگو کرتے ہوئے بابر اعظم نے کہا کہ میرے خیال میں ورلڈ کپ سے پہلے سیریز وائٹل تھی، جب بیک ٹو بیک وکٹ گرتی ہیں تو مڈل آرڈر پر پریشر آتا ہے، کھلاڑی کے طور پر پریشر ہوتا ہے ،جب مجھ سے اسکور نہیں ہوتا تو مجھ پر پریشر ہوتا ہے کہ پاکستان اور ٹیم کے لیے اسکور کریں، ہم اس پر سوچیں گے اور کوئی حل نکالیں گے۔

انہوں نے کہا کہ میرے خیال میں اوور آل کرکٹ اچھی ہوئی ہے اور کلوز میچ ہوئے ہیں، ہم کوشش کرتے ہیں کہ جہاں غلطی ہوتی ہے اس پر بات چیت کر کے اپنی خامی پر قابو پالیں، مجھ سے کیچ ڈراپ ہوئے اگر نہ ہوتے تو کچھ میچ کا نتیجہ مختلف ہوتا۔

بابر اعظم نے کہا کہ 'جب آپ اچھا اسکور کرتے ہیں تو اعتماد آتا ہے، آسٹریلیا میں اچھی کرکٹ کھیلیں گے اور کوشش کریں گے اچھے رزلٹ آئیں'۔ انہوں نے کہا کہ انگلینڈ ٹیم میں ٹاپ آرڈر جب اچھا کھیلتے ہیں مڈل آرڈر سپورٹ دیتے ہیں، مڈل آرڈر پر تشویش ہے،اس مسئلہ پر بات کریں گے اور کوچنگ اسٹاف اس خامی کو دور کرنے کی کوشش کررہا ہے۔

مزید پڑھیں: فیصلہ کن ٹی20 میں پاکستان کو 67 رنز سے شکست، انگلینڈ نے سیریز جیت لی

بابر اعظم نے کہا کہ پرفارمنس نہ ہونے سے پلیئرز پر دباؤ آتا ہے، ہار جیت کرکٹ کی خوبصورتی ہے، بہتری کی ہمیشہ کوشش کرتے ییں، آسٹریلیا میں کنڈیشنز سے ہم آہنگ ہوکر بہتر کارکردگی دکھانے کی کوشش کریں گے۔