یمن میں موبائل پر بیوی سے باتوں میں مشغول شخص کو لگڑ بھگا کھا گیا
بدقسمت شخص کے بیٹے جائے وقوعہ پر پہنچے تو انھیں اپنے والد کے خون میں لپت پت پھٹے ہوئے کپڑے، کھوپڑی اور ٹانگیں ہی ملیں۔ فوٹو؛ فائل
یمن کے شمالی صوبے ریما میں ایک شخص کا موبائل پر اپنی بیوی سے بات کرنا اس وقت جان لیوا ثابت ہوا جب دوران گفتگو لگڑ بھگے نے اس پر حملہ کر کے اسے چیر پھاڑ کر رکھ دیا۔
عرب ویب سائٹ کے مطابق مقتول شخص موبائل پر اپنی بیوی کو لگڑ بھگے کے پہلے حملے میں بچ نکلنے کا احوال سنا رہا رہا تھا کہ اسی دوران خطرناک جنگلی جانور نے اس پر دوسرا حملہ کر دیا جو جان لیوا ثابت ہوا۔
رپورٹ میں متاثرہ شخص کے ایک قریبی رشتہ دار کے حوالے سے لکھا گیا ہے کہ وہ فون پر اپنی اہلیہ سے بات کر ہی رہا تھا کہ لگڑ بھگے نے ایک مرتبہ پھر اس پر حملہ کر دیا، یمنی شخص کی اہلیہ نے جب اپنے شوہر کی چیخ و پکار سنی تو اس نے فورا اپنے بیٹوں کو جائے وقوعہ پرخاوند کی مدد کے لئے پہنچنے کا حکم دیا لیکن جب بدقسمت شخص کے بیٹے وہاں پہنچے تو انھیں اپنے والد کے صرف خون میں لپت پت پھٹے ہوئے کپڑے، کھوپڑی اور ٹانگیں ہی ملیں۔
رپورٹ میں مزید کہا گیا ہے کہ یمن کا شمالی صوبہ ریما جنگی حیات کا مسکن تصور کی جاتا ہے اور لگڑ بھگے کے حملے کا نشانہ بننے والے شخص کو بھی خبردار کیا گیا تھا کہ وہ رات کے وقت اس علاقے کا سفر نہ کرے۔