والدہ کو اسلحہ کے زور پر جان سے مارنے کی دھمکیاں دینے والا ناخلف بیٹا گرفتار

اپنی والدہ کو بندوق کی نوک پر جان سے مار دینے کی دھمکیاں دینے والے ناخلف بیٹے کو گرفتار کرلیا گیا۔

صدر واہ تھانے کی حدود میں پولیس نے والدہ کی درخواست پر کارروائی کرتے ہوئے مقدمہ درج کرکے ملزم نصیر شاہ کو گرفتار کرلیا۔ ملزم سے شراب کی بوتل برآمد ہوئی، جس پر ایک الگ مقدمہ بھی درج کیا گیا ہے۔


مدعیہ خاتون نے پولیس کو دی گئی درخواست میں کہا کہ میرا بیٹا نصیر نشہ کرتا اور جان سے مارنے کی دھمکیاں دیتا ہے، جس پر پولیس نے کارروائی کی۔

ایس پی پوٹھوہار ملک طارق محبوب نے ملزم کے خلاف قانونی کارروائی کرنے کی ہدایت کرتے ہوئے کہا کہ والدہ جیسی عظیم ہستی پر تشدد ناقابل تصور اور افسوس ناک ہے۔ رشتوں کا تقدس پامال کرنے والے ملزم کوقرار واقعی سزادلوائی جائے گی۔