خصوصی افراد کیلیے معذور لفظ کی اصطلاح استعمال کرنے سے روک دیا گیا
آئین پاکستان تمام شہریوں کو بلا امتیاز برابر حقوق فراہم کرتا ہے، فیصلہ
فیصلہ پنجاب میں گریڈ 17 کی ملازمتوں میں اقلیتوں اور خصوصی افراد کے کوٹے سے متعلق کیس میں دیا گیا۔ فائل : فوٹو
جسٹس منصور علی شاہ نے آٹھ صفحات پر مشتمل فیصلہ جاری کیا، فیصلہ پنجاب میں گریڈ 17 کی ملازمتوں میں اقلیتوں اور خصوصی افراد کے کوٹے سے متعلق کیس میں دیا گیا۔
فیصلے میں کہا گیا کہ سپریم کورٹ ایک کیس میں کہہ چکی ہے کہ خصوصی افراد کے لیے معذور افراد کے الفاظ استعمال نہ کیے جائیں لہٰذا پنجاب پبلک سروس کمیشن خصوصی افراد کے لیے معذور جیسے الفاظ استعمال نہ کرے، آئین پاکستان تمام شہریوں کو بلا امتیاز برابر حقوق فراہم کرتا ہے۔
عالمی رپورٹس کے مطابق منفی سماجی رویوں اور دفاتر تک رسائی میں مشکلات کے سبب خصوصی افراد عملی زندگی میں پیچھے رہ جاتے ہیں، ریاست کی ذمہ داری ہے کہ خصوصی افراد کے بنیادی حقوق کا مکمل تحفظ کرے۔
سپریم کورٹ نے فیصلے میں کہا کہ پاکستان میں اقلیتوں کی آبادی مجموعی آبادی کا تین فیصد ہے، قومی پرچم میں بھی اقلیتوں کی نمائندگی کی واضح جھلک ملتی ہے جبکہ قائد اعظم بھی مختلف مواقع پر اقلیتوں کے حقوق پر زور دیتے رہے، آئین پاکستان نے اقلیتی برادری کو مکمل مذہبی، معاشی اور سماجی تحفظ دے رکھا ہے۔