کراچی بلدیاتی انتخابات دو یوسیز کے نتائج کیخلاف پی ٹی آئی کی درخواستیں مسترد

سندھ ہائیکورٹ نے کراچی کے علاقے بلدیہ ٹاؤن کی دو یونین کونسلز کے نتائج کے خلاف پی ٹی آئی کی درخواستیں مسترد کردیں۔

چیف جسٹس سندھ ہائیکورٹ جسٹس احمد علی شیخ کی سربراہی میں دو رکنی بینچ نے پی ٹی آئی کی بلدیہ ٹاؤن کی 2 یونین کمیٹیوں کے نتائج کیخلاف درخواستوں پر محفوظ فیصلہ سنایا۔


عدالت نے بلدیہ ٹاؤن کی یوسی 8 اور 4 کے نتائج کے خلاف پی ٹی آئی کی درخواستیں مسترد کردیں۔ عدالت نے فیصلے میں کہا کہ درخواستگزاروں کے وکیل نے موقف اپنایا تھا کہ یوسی 8 سے کامیابی کے باوجود ناکام قرار دیا جارہا ہے۔ یوسی 4 کے نتائج تبدیل کرکے ناکام قرار دینے کی کوشش ہے۔

عدالتی فیصلے میں کہا گیا کہ درخواست گزاروں کے الزام کا جائزہ اس درخواست میں نہیں لیا جاسکتا۔ نتائج کی تبدیلی اور دیگر الزامات کیلئے ٹریبونل سے رجوع کیا جاسکتا ہے۔

واضح رہے کہ پی ٹی آئی کے امیدواروں کی جانب سے سندھ ہائی کورٹ میں درخواست دائر کی گئی تھی جس پر عدالت نے دلائل مکمل ہونے کے بعد گزشتہ روز فیصلہ محفوظ کیا تھا۔ دائر درخواست میں پی ٹی آئی امیدواروں نے استدعا کی تھی کہ مخالفین امیدواروں کی مبینہ کامیابی کے نوٹیفکیشن کو روکا جائے۔