بالآخر رانی مکھرجی بھی پیا گھر سدھار گئیں

بالی ووڈ اداکارہ رانی مکھرجی نے بالآخر اپنے دوست اور یش راج فلمز کے مالک ادتیا چوپڑا سے شادی رچا لی ہے۔


بھارتی میڈیا رپورٹس کے مطابق رانی مکھرجی اور ادتیا چوپڑا کی شادی کی تقریب اٹلی میں منعقد ہوئی جس میں دونوں کے عزیز و اقارب اور قریبی دوستوں نے شرکت کی، دونوں نے باقاعدہ پریس ریلیز کے ذریعے اپنی شادی کی تصدیق کر دی ہے۔

واضح رہے کہ بالی وڈ اداکارہ رانی مکھرجی اور ادتیا چوپڑہ کی دوستی کے چرچے میڈیا پر زیر گردش رہے ہیں لیکن دونوں نے میڈیا پر کبھی اپنی محبت کا اظہار نہیں کیا۔ رانی مکھرجی کے شوہرادتیا چوپڑہ بالی وڈ کے معروف ہدایت کار ہیں جن کی فلموں 'محبتیں' اور 'دل والے دلہنیا لےجائیں گے' نے باکس آفس پر کامیابی کے جھنڈے گاڑے تھے۔