بھارتی فلموں کی نمائش سے جو نقصان ہوچکا اس کے ازالے کیلئے ہم سب کوششیں کررہے ہیں اداکار ندیم

سینئر اداکار ندیم نے کہا کہ جب تک بھارتی فلموں کی نمائش کے بارے میں کوئی فیصلہ نہیں کیا جاتا، اس وقت تک پاکستانی فلموں کو تحفظ حاصل نہیں ہوگا۔

کراچی میں انٹرویو دیتے ہوئے اداکار ندیم نے کہا کہ حکومت کو پاکستانی فلموں کی حوصلہ افزائی کے لیے اقدامات کرنے چاہیئں۔ ان کا کہنا تھا کہ سنیما انڈسٹری نے بلاشبہ اپنی ذمے داری کو پورا کیا ہے، پاکستان میں نئے جدید سنیما گھروں کی تعداد بڑھنا بڑا کارنامہ ہے لیکن اب سنیما مالکان کو چاہیے کہ وہ صرف پاکستانی فلموں کی نمائش کے لیے بھی ایسے اقدامات کریں کہ ہماری فلمیں آسانی سے سنیما گھروں تک پہنچ سکیں۔


اداکار ندیم نے کہا کہ بھارتی فلموں کی پاکستان میں نمائش سے جو نقصان ہوچکا ہے اس کے ازالے کے لیے ہم سب کوششیں کررہے ہیں جب کہ فلم انڈسٹری کی بحالی کے بعد بہت اچھا کام ہورہا ہے۔