علمہ جعفری ڈراما ’’میرے سپنے‘‘ میں جلوہ گر لاجواب اداکاری کے رنگ جمادیے

پاکستان ڈراما انڈسٹری کی ابھرتی ہوئی اداکارہ علمہ جعفری نے نئے سیریل میں اپنی خوبصورت اور جاندار اداکاری سے مداحوں کے دل جیت لیے۔

تھیکے نین اور جاذب نظر ناک نقشے کی مالک، خوبصورت اداکارہ علمہ جعفری کسی تعریف کی محتاج نہیں۔ نہایت کم عمری اور مختصر سے عرصے میں انھوں نے اپنی مقبولیت کے جھنڈے گاڑ دیے۔

معروف ڈرامے پری زاد میں جانو کی اہلیہ کا کردار اس انداز سے نبھایا کہ جوہریوں نے ایک آن میں پہچان لیا کہ ڈراما انڈسٹری کو باصلاحیت اداکارہ اور ایک خوبصورت چہرہ مل گیا۔

پری زاد کے بعد ستم، تانا بانا اور متعدد پروڈکٹس کی ماڈلنگ کرکے علمہ اپنے قدم جما چکی ہیں۔ یہی وجہ ہے کہ انھیں نئے ڈراموں اور سیریل کی پیشکشیں ہورہی ہیں۔




حال ہی میں علمہ جعفری من ٹی وی کے لیے سید ساجد حسین کی ہدایتکاری میں بننے والے ڈرامے ''میرے سپنے'' میں جلوہ گر ہیں۔ جسے دیکھ کر اندازہ ہوتا ہے کہ ان کی اداکاری نکھرتی جا رہی ہے۔

علمہ جعفری نے بتایا کہ ڈراما کے انتخاب میں اسکرپٹ اور پھر ٹیم کا ضرور خیال رکھتی ہیں۔ جس کردار میں اداکاری کا مارجن وہی کیریکٹر کرنے میں مزہ آتا ہے۔

تیزی سے مقبول ہوتی اداکارہ علمہ جعفری نے مزید کہا کہ وہ سینیئر اداکاروں سے سیکھتی ہیں۔ یہ ہمارا اثاثہ ہیں اور ڈراما انڈسٹری میں ان کی حیثیت ایک اکیڈمی کے برابر ہے۔