ملک میں کپاس کی مجموعی پیداوار میں اضافہ

ملک میں کپاس کی مجموعی پیداوار میں اضافہ ریکارڈ کیا گیا ہے۔

پاکستان کاٹن جنرز ایسوسی ایشن کی جانب سے جمعے کو جاری ہونے والے اعداد و شمار کے مطابق 15اگست 2023 تک ملک بھر کی جننگ فیکٹریوں میں مجموعی طور پر روئی کی 21لاکھ 15ہزار گانٹھوں کے مساوی پھٹی پہنچی ہے جو کہ کاٹن ایئر 2022-23 کی کل پیداوار کا تقریباً 43 فیصد ہے جس سے توقع ہے۔

کاٹن ایئر 2023-24 کے دوران پاکستان میں کپاس کی مجموعی پیداوار ایک کروڑ 10 لاکھ گانٹھ سے زائد ہونے کے امکانات ہیں۔


یہ بھی پڑھیں: شدید بارشوں نے کپاس پیداوار کے ہدف کا حصول ناممکن بنا دیا

رپورٹ کے مطابق زیرتبصرہ مدت تک پنجاب کی جننگ فیکٹریوں میں 6لاکھ 37ہزار جبکہ سندھ کی جننگ فیکٹریوں میں 14لاکھ79ہزار گانٹھوں کے مساوی پھٹی کی ترسیل ہوئی ہے۔

رپورٹ کے مطابق ٹیکسٹائل ملوں کی جانب سے اب تک 18 لاکھ 60ہزار گانٹھوں کی خریداری کی ہے جبکہ ایک لاکھ 89ہزار گانٹھیں جننگ فیکٹریوں میں فروخت کے لیے دستیاب ہیں۔

چیئرمین کاٹن جنرز فورم احسان الحق نے بتایا کہ رپورٹ کی خاص بات سندھ میں رواں سال کپاس کی بھر پور پیداوار ہے جو پچھلے کاٹن ائیر کی کل پیداوار کا تقریباً 79فیصد ہے جس سے توقع ہے کہ رواں سال سندھ میں کپاس کی کل پیداوار 35لاکھ گانٹھوں کے لگ بھگ ہو سکتی ہے۔