رجنی کانت دپیکا کی فلم ’’کوچڈیاں‘‘ 23 مئی کو ریلیز ہو گی

لاہور:
بھارتی سپر اسٹار رجنی کانت اور دیپکا پڈوکون کی فلم ''کوچڈیاں'' کی نمائش اب 23 مئی کو ہو گی۔


تفصیلات کے مطابق تامل اور ہندی زبان میں بنائی جانیوالی میگا بجٹ کی تھری ڈی فلم ''کوچڈیاں'' 9 مئی کو سینما گھروں کی زینت بننی تھی مگر بھارت میں پندرہ مئی تک الیکشن کی گہما گہمی کو دیکھتے ہوئے پروڈیوسر نے کسی قسم کا رسک لینے کی بجائے اس کی نمائش دو ہفتے آگے بڑھا دی، جس پر پاکستان اور بھارت سمیت دیگر ممالک میں مذکورہ فلم کا بے چینی سے انتظار کرنیوالوں میں مایوسی پھیل گئی کیونکہ دیپکا پڈوکون پہلی مرتبہ رجنی کانت کے ساتھ بطور ہیروئن جلوہ گر ہو رہی ہیں۔

یہ فلم ہندی زبان میں ''رانا'' اور تامل میں ''کوچڈیاں'' کے نام سے ریلیز ہوگی۔ رجنی کانت کی اس سے قبل ایشوریا رائے کے ساتھ فلم ''روبوٹ'' کو بھی بیحد پسند کیا گیا تھا جب کہ حال ہی میں انھوں نے سوناکشی سنہا کے ساتھ بھی ایک فلم کرنے کا معاہدہ کیا ہے۔