کورولش عثمان کا اسپیشل سیکیورٹی یونٹ ہیڈ کوارٹرز کا دورہ

عالمی شہرت یافتہ ترکش سیریز 'کورولش عثمان' میں مرکزی کردار ادا کرنے والے تُرک اداکار بوراک اوزچیوت عرف عثمان بے نے اسپیشل سیکیورٹی یونٹ (ایس ایس یو) ہیڈ کوارٹرز کا دورہ کیا۔

تُرک اداکار بوراک اوزچیوت حال ہی میں پاکستان پہنچے ہیں اور گزشتہ روز اُن کا کراچی کے نجی شاپنگ سینٹر میں شاندار استقبال کیا گیا جبکہ بوراک نے اسپیشل سیکیورٹی یونٹ (ایس ایس یو) ہیڈ کوارٹرز کا دورہ بھی کیا۔

اس موقع پر ڈی آئی جی سیکیورٹی اینڈ ایمرجنسی سروسز ڈویژن کراچی ڈاکٹر مقصود احمد نے بوراک اوزچیوت کا استقبال کیا، ترک اداکار نے ڈی آئی جی سیکیورٹی اینڈ ایمرجنسی سروسز ڈویژن کراچی کے ہمراہ ایس ایس یو کے مختلف شعبوں کا دورہ کرتے ہوئے ایس ایس یو کی موجودہ پیشہ وارانہ مہارت اور انتظامات کی تعریف کی۔

مزید پڑھیں: 'کورولوش عثمان' کی کراچی پہنچتے ہی تصویر وائرل


بوراک اوزچیوت نے ایس ایس یو کے انتظامی، سیکیورٹی اور انسداد دہشت گردی امور میں اعلیٰ پیشہ وارانہ معیار کو سراہا اور اپنے خیالات کا اظہار کرتے ہوئے کہا کہ وہ پاکستانی عوام کی طرف سے دی گئی پرتپاک مہمان نوازی پر بہت اچھا محسوس کر رہے ہیں۔

بعدازاں ڈی آئی جی سیکیورٹی اینڈ ایمرجنسی سروسز ڈویژن نے بوراک اوزچیوت کو اعزازی شیلڈ بھی پیش کی۔

مزید پڑھیں: کورولش عثمان کے مداحوں کا انتظار ختم،5ویں سیزن کا ٹیزر جاری

واضح رہے کہ گزشتہ دونوں بوراک نے بتایا تھا کہ 'وہ رواں ماہ 7 اکتوبر کو پاکستان آرہے ہیں'۔

اداکار نے پاکستان آنے کی وجہ بتاتے ہوئے کہا تھا کہ 'وہ پاکستانی نجی پرفیوم برانڈ کے برانڈ ایمبیسڈر کی حیثیت سے پرفیوم کی لانچ پر پاکستان آئیں گے'۔