آصفہ بھٹو کی پارٹی کارکنان سے ملاقات انتخابی مہم تیز کرنے کی ہدایت

شہید محترمہ بینظیر بھٹو کی صاحبزادی آصفہ بھٹو زرداری نے بلاول ہاؤس میں پی پی پی کارکنان سے ملاقات میں انہیں انتخابی مہم مزید تیز کرنے کی ہدایت کی۔

ایکسپریس نیوز کے مطابق آصفہ بھٹو زرداری سے بلاول ہاؤس میں پارٹی کارکنان نے ملاقات کی۔ اس موقع پر آصفہ بھٹو نے کہا کہ پاکستان پیپلزپارٹی کے چیئرمین بلاول بھٹو زرداری کا 10 نکاتی ایجنڈا پاکستان کے تمام مسائل کا حل ہے ۔

انہوں نے کہا کہ پیپلزپارٹی کا 10 نکاتی ایجنڈا عام آدمی کو مہنگائی اور بے روزگاری سے نجات دے گا۔

آصفہ بھٹو کا کہنا تھا کہ پاکستان کے عوام نے شہر شہر ہونے والے جلسوں میں مثالی شرکت کرکے پیغام دے دیا ہے کہ وہ ملک میں سیاسی استحکام کے خواہش مند ہیں، پیپلزپارٹی کو ووٹ دینا ملک میں نفرت اور تقسیم کی سیاس کو دفن کرنے کے مترادف ہوگا۔

چیئرمین پیپلز پارٹی کی ہمشیرہ نے کہا کہ 8 فروری پاکستان پیپلزپارٹی کی جیت کا دن ہوگا، اس دن ترقی یافتہ اور روشن پاکستان کا حقیقی سفر شروع ہوگا۔


اس موقع پر آصفہ بھٹو نے پارٹی کارکنان کواین اے 127 میں انتخابی مہم مزید تیز کرنے کی ہدایت کی۔

آصفہ بھٹو سے ملاقات کرنے والوں میں عارفہ بھٹو، سحر کامران، فواد زیدی، شائستہ اسلم، سبط حسن، نایاب جان، عائشہ نواز، موسی کھوکھر اور سکینہ حسن شامل تھے۔

عثمان اعوان، بشارت علی، سارہ رائے، میاں نعمان، عمار، رائے ارسلان، شیخ عمران، ماہم عامر، مارخ عامر، ڈاکٹر رضوان اور ناصر قاضی بھی ملاقات میں موجود تھے۔

آصفہ بھٹو زرداری سے صحافی مائرہ ہاشمی کے علاوہ اسامہ فیاض، عائشہ، سدرہ، عائشہ فیاض، ایان اور خالد رفیق نے بھی ملاقات کی۔