خیبر میں فورسز کے آپریشن میں داعش کا کمانڈر سورت گل ہلاک

خیبر پختون خوا کے ضلع خیبر میں فورسز کے آپریشن میں دہشت گرد کمانڈر ہلاک ہوگیا۔

آئی ایس پی آر کے مطابق سیکیورٹی فورسز نے ہائی پروفائل دہشت گرد کی موجودگی کی اطلاع پر ضلع خیبر میں انٹیلی جنس آپریشن کیا۔


آپریشن کے دوران، شدید فائرنگ کے تبادلے کے بعد داعش کے دہشت گرد کمانڈر سورت گل عرف سیف اللہ کو ہلاک کردیا گیا۔ مارے گئے دہشت گرد کمانڈر سے اسلحہ، گولہ بارود اور دھماکہ خیز مواد بھی برآمد ہوا۔

آئی ایس پی آر کے مطابق سورت گل بے گناہ شہریوں کی ٹارگٹ کلنگ، بھتہ خوری سمیت دہشت گردی کی متعدد کارروائیوں میں سرگرم رہا اور قانون نافذ کرنے والے اداروں کو انتہائی مطلوب تھا۔ علاقے میں پائے جانے والے کسی دوسرے دہشت گرد کو ختم کرنے کے لیے آپریشن کیا جا رہا ہے۔