کراچی ایئرپورٹ پر حملہ کرنے والوں کو ان کے ٹھکانوں پر شکست دیں گے خواجہ آصف

وفاقی وزیر دفاع خواجہ آصف نے کہا ہے کہ کراچی ایئر پورٹ پر حملہ ناقابل معافی ہے۔ دہشت گردوں کو ایسا جواب دیا جائے گا کہ مستقبل میں کوئی ایسا کرنے کی جراٴت نہیں کرے گا۔


اسلام آباد سے جاری اپنے بیان میں وزیر دفاع خواجہ آصف نے کہا کہ دہشت گردوں نے کراچی ایئر پورٹ پر حملہ کرکے قومی اثاثوں اور اہم تنصیبات کو نشانہ بناکر ناقابل معافی جرم کیا ہے جسے کسی بھی طرح معاف نہیں کیا جاسکتا۔ ان کا کہنا تھا کہ دہشت گردی میں ملوث ملزمان اور ان کی معاونت کرنے والوں کو ان کے اڈوں میں شکست دی جائے گی۔ دہشت گردی کا یہ عمل ناقابل معافی ہے جس کا بھرپور جواب دیاجائے گا تاکہ آئندہ کوئی اس طرح کی بزدلانہ کارروائی کی جرات نہ کر سکے۔