وزیراعظم کا انتخابی اصلاحات سے متعلق سفارشات تیارکرنے کیلئے اسپیکرکوخط

وزیراعظم نواز شریف نے انتخابی اصلاحات کے لئے اسپیکر قومی اسمبلی ایاز صادق کو خط لکھا ہے جس میں انتخابی اصلاحات سے متعلق سفارشات تیار کرنے کا کہا گیا ہے ۔

ایکسپریس نیوز کے مطابق اسپیکر قومی اسمبلی ایاز صادق کو لکھے گئے خط میں وزیراعظم نوازشریف کا کہنا تھا کہ شفاف انتخابات سے متعلق انتخابی اصلاحات کی جامع سفارشات تیار کی جائیں جبکہ اس حوالے سے قومی اسمبلی اور سینیٹ کے ارکان پر مشتمل کمیٹی تشکیل دی جائے جو انتخابی اصلاحات کے لئے جامع پلان تشکیل دے ۔

واضح رہے کہ انتخابات میں دھاندلی کے خلاف اور انتخابی اصلاحات کے لئے تحریک انصاف کی جانب سے مہم جاری ہے جس کے دوران ہر جمعہ کو اسلام آباد میں الیکشن کمیشن کے دفتر کے باہر مظاہرے کئے جاتے ہیں ۔