لاس اینجلس میں تاریخ کی سب سے بڑی چوری

امریکا میں کسی نے لاس اینجلس میں واقع گارڈا ورلڈ (Gardaworld) کیش اسٹوریج کی سہولت سے 30 ملین ڈالرز چوری کرلیے ہیں جسے لاس اینجلس کی تاریخ میں سب سے بڑی ڈکیتی قرار دیا گیا ہے۔

کینیڈا کی سیکیورٹی کمپنی گارڈاورلڈ نقد ذخیرہ کرنے، ٹرانسپورٹیشن کی خدمات اور کلائنٹس کی رقم کو اس وقت تک محفوظ رکھنے کی خدمات پیش کرتی ہے جب تک اسے استعمال یا بینک میں منتقل نہ کیا جائے۔

گارڈاورلڈ دنیا میں سب سے بہترین سیکورٹی کمپنیوں میں سے ایک ہے جس میں درجنوں گارڈز، الارم، موشن ڈیٹیکٹر اور بہترین نگرانی کے آلات موجود ہیں۔


تاہم اس کے باوجود کوئی ان تمام حفاظتی اقدامات کو چکما دے کر 30 ملین ڈالرز چوری کرنے میں اسطرح کامیاب ہوا کہ 24 گھںٹوں تک کسی کو بھی اس چوری کا پتہ ہی نہیں چل سکا۔

لاس اینجلس پولیس ڈیپارٹمنٹ (لے اے پی ڈی) اور FBI نے ڈکیتی کی تحقیقات کا آغاز کردیا ہے۔ یہ اب بھی جاننے کی کوشش کی جارہی ہے کہ کوئی کیسے اس جگہ سے چوری کرنے میں کامیاب ہوگیا۔

گارڈاورلڈ جیسے کیش اسٹوریج کمپلیکس تک رسائی حاصل کرنا ایک بات ہے لیکن بغیر کسی الارم بجنے کے احاطے میں آنے، نشان چھوڑے بغیر تجوری کھولنے اور دسیوں ملین ڈالرز کے ساتھ فرار ہونے کیلئے تیاری، مہارت اور معلومات کی ضرورت ہوتی ہے۔