کازوے ندی میں کچرا کنڈی سے خاتون اور بچی کی تشدد زدہ لاشیں ملیں

کورنگی کازوے ندی گاربیج ڈمپنگ پوائٹ سے منگل کی صبح نامعلوم خاتون اورکمسن بچی کی تشدد زدہ لاشیں ملی ہیں جنہیں نامعلوم ملزمان نے سروں پر پتھرمارکرقتل کیا،بظاہر مقتولہ خاتون اور کمسن بچی ماں بیٹی معلوم ہوتی ہیں۔

مقتولہ خاتون اور بچی کی شناخت اور قتل میں ملوث ملزمان کی تلاش جاری ہے۔

کورنگی صنعتی ایریا تھانے کی پولیس موقع پرپہنچ گئی اوردونوں لاشیں تحویل میں لینے کے بعد قانونی کارروائی کے لیے جناح اسپتال منتقل کردیں۔

ایس ایچ اوکورنگی صنعتی ایریا خالد محمود نے ایکسپریس کو بتایا کہ جاں بحق خاتون اوربچی کےپاس سے ایسی کوئی چیز برآمد نہیں ہوسکی جس کی مدد سے ان کی شناخت ممکن ہوسکے،بظاہر مقتولہ خاتون اورکمسن بچی ماں بیٹی معلوم ہوتی ہیں۔


خاتون اورکمسن بچی کو نامعلوم مسلح ملزمان نے سروں پر پتھر مار کے قتل کیا ہے،پولیس کو جائےوقوع سے خون آلود پتھربھی ملے ہیں جنہیں پولیس نے اپنی تحویل میں لے لیا۔

انھوں نے بتایا کہ مقتولہ خاتون اور کمسن بچی کی لاشیں کچھ گھنٹے پرانی معلوم ہوتی ہیں شبہ ہے کہ ملزمان نے رات گئے خاتون اور کمسن بچی کو قتل کیا۔

ایس ایچ او نے بتایا کہ مقتولہ خاتون اور بچی کے فنگر پرنٹس نادرا حکام کو بھجوائے ہیں۔ امید ہے مقتولہ خاتون اور بچی کی شناخت ہو جائے گی۔

انھوں نے بتایا کہ لاشیں ملنے کی اطلاع ڈمپنگ پوائنٹ پرکچرا پھینکے والے عملے کی جانب سے دی گئی تھی۔

ایس ایچ اونے بتایا کہ دوہرے قتل میں ملوث ملزمان کی تلاش جاری ہے پولیس واقعے کی مزید تفتیش کر رہی ہے.