رمضان المبارک میں حکومت نے عوام پر سی این جی کی قیمت میں اضافے کا بم گرادیا

لاہور:
مہنگائی کی ماری عوام پر اب حکومت کی جانب سے سی این جی کی قیمتوں میں اضافے کا بوجھ بھی ڈال گیا ہے اور ملک بھر میں سی این جی کی قیمتوں میں 5 روپے 36 پیسے فی کلو تک کا اضافہ کردیا گیا ہے۔


اوگرا کے چیرمین سعید احمد کے مطابق سی این جی کی قیمتوں میں اضافہ گیس انفرااسٹرکچر ٹیکس کے بڑھنے پر کیا گیا جس کے بعد صوبہ خیبر پختونخوا، پنجاب کے ضلع پوٹھوہار اور بلوچستان کے علاقوں پر مشتمل ریجن ون میں سی این جی کی نئی قیمت 2 روپے 10 پیسے فی کلو اضافے سے 76 روپے 35 پیسے مقرر کی گئی ہے جبکہ ریجن ٹو میں سی این جی کی قیمت میں 5 روپے 36 پیسے فی کلو کا اضافہ کیا گیا ہے جس کے بعد صوبہ سندھ اور پوٹھوہار کے علاوہ صوبہ پنجاب کے باقی اضلاع پر مشتمل اس ریجن میں سی این جی کی نئی قیمت 71 روپے 50 پیسے ہوگئی ہے۔