اداکارہ نمرہ خان کے مبینہ اغوا کیس کا ڈراپ سین ہوگیا

ڈیفنس میں اداکارہ نمرہ خان کو مبینہ طور پر اغواء کیے جانے والے کیس کا ڈراپ سین ہوگیا۔

ایکسپریس نیوز کے مطابق ایس ڈی پی او درخشاں منیشا روپیتا نے تفتیش سے متعلق ویڈیو بیان میں ماڈل کو اغواء نہیں بلکہ ہراساں کیے جانے کا انکشاف کیا ہے۔

اداکارہ کے ویڈیو بیان کے بعد ڈی آئی جی سائوتھ اور ایس ایس پی سائوتھ نے واقعے کا نوٹس لے کر تحقیقات کا حکم دیا جس کے بعد ڈی ایس پی درخشاں نے واقعے کے تفتیش کی۔

پولیس افسر منیشا روپیتا کا کہنا ہے کہ تفتیش میں یہ بات واضح ہوگئی کہ ملزم ایک ہی تھا جو کہ موٹر سائیکل پر سوار تھا اور ملزم کے ساتھ کوئی اور فرد نہیں تھا۔


انہوں نے کہا کہ یہ اغوا کا نہیں بلکہ ہراسانی کا وقعہ تھا اور حالیہ دنوں میں خواتین کو ہراساں کیے جانے کے دو واقعات سامنے آئے تھے اور دونوں واقعات کے ملزمان کو گرفتار کرلیا گیا تھا۔

یہ بھی پڑھیں : نمرہ خان کو اغواء کرنے کی کوشش کی سی سی ٹی وی فوٹیج منظرِ عام پر

منیشا روپیتا کے مطابق نمرہ خان کیس کے ملزم کا روٹ میپ تیار کرلیا گیا ہے، تلاش جاری ہے اور جلد ملزم پولیس کی گرفت میں ہوگا۔

اداکارہ نمرہ خان کا کہنا ہے کی وہ پولیس کی کارکردگی سے انتہائی مطمئن ہیں، پولیس نے دن رات کوشش کرکے تفتیش کی اور شواہد اکٹھا کیے۔