تعلیمی ادارے کے طلبا میں منشیات فروخت کرنیوالی خاتون اسمگلر گرفتار

اینٹی نارکوٹکس فورس نے وفاقی دارالحکومت اسلام آباد کے معروف تعلیمی ادارے کے طلباء میں منشیات کا زہر پھیلا کر انھیں منشیات کا عادی بنانے میں ملوث خاتون منشیات اسمگلر کو گرفتار کرلیا۔

ایکسپریس نیوز کے مطابق اے این ایف کی جانب سے کارروائی میں ملوث خاتون سے ایک کلو گرام سے زائد افیون اور ساڑے 4 کلو گرام سے زائد چرس برآمد کرکے مقدمہ درج کرلیا گیا ہے جبکہ گینگ کے دیگر اراکین کی گرفتاری کے لیے چھاپے مارے جارہے ہیں۔


حکام کا کہنا تھا کہ ابتدائی تحقیقات کے مطابق ملزمہ کا تعلق پشاور سے ہے جو منشیات اسمگل کرکے تعلیمی ادارے تک پہچاتی تھی، ملزمہ نے یونیورسٹی کے طلباء کو منشیات فروخت کرنے کا انکشاف بھی کیا۔

قبل ازیں گزشتہ روز اے این ایف کی مختلف کارروائیوں میں 70 کروڑ روپے مالیت کی منشیات برآمد کرتے ہوئے 6 ملزمان کو حراست میں لیا تھا۔