تحفظ پاکستان آرڈیننس کو سپریم کورٹ میں چیلنج کریں گےامیر جماعت اسلامی

امیر جماعت اسلامی سراج الحق نے تحفظ پاکستان آرڈیننس کو سپریم کورٹ میں چیلنج کرنے کا اعلان کردیا ہے۔


پشاورمیں پریس کانفرنس کے دوران امیرجماعت اسلامی سراج الحق نے کہا کہ تحفظ پاکستان آرڈیننس کالا قانون ہے،جس کے اطلاق سے ملک پولیس اسٹیٹ میں تبدیل ہوجائے گا۔ اس قانون کو سیاسی مفادات کے لئے استعمال کیا جاسکتا ہے، جن لوگوں نے یہ قانون منظور کروایا ہے، مستقبل میں اس کا استعمال بھی ان ہی لوگوں کے خلاف ہوگا، جماعت اسلامی اس قانون کے خلاف ہے اور اسے عدالت میں چیلنج کرے گی۔

اس موقع پر سراج الحق نے اسرائیلی مظالم کے خلاف جماعت اسلامی کی جانب سے پیر سے ہفتہ احتجاج منانے کا اعلان کیا۔ انہوں نے کہا کہ ہفتہ احتجاج کے دوران غزہ میں نہتے فلسطینیوں پر صیہونی بربریت کے خلاف ملک بھر میں جلسے اور جلوس نکالے جائیں گے۔