ملک ٹھیک کرنے کا ٹھیکہ صرف عمران خان نے لیا ہے اور کسی کی ذمہ داری نہیں؟ علی محمد خان

پی ٹی آئی رہنما علی محمد خان نے کہا ہے کہ کیا ملک ٹھیک کرنے کا ٹھیکہ صرف عمران خان نے لے رکھا یے؟ باقی کسی اور کی ذمہ داری نہیں ہے؟

اڈیالہ جیل کے باہر میڈیا ٹاک میں انہوں نے کہا کہ پوری دنیا میں کشمیریوں کا بلیک ڈے منایا گیا ہم نے حمایت کی، مقبوضہ کشمیر میں یہ ظلم بھارت کر رہا ہے پاکستان میں کون کر رہا ہے؟ کسی عام قیدی سے بھی آپ ایسا نہیں کرتے جو عمران خان کے ساتھ کیا گیا، ان کے سیل کی بجلی بند کی گئی، کیا نیوکلر ملک میں ایک سابق وزیر اعظم کو سیکیورٹی نہیں دی جاسکتی؟

انہوں نے کہا کہ دنیا نے دیکھا ترمیم کے لیے لوگوں کو اٹھایا گیا اور زور زبردستی کی گئی، ضمیر کے سودے کیے گئے، آج عدالت کے حکم پر آیا لیکن مجھے نہیں ملنے دیا گیا، سوال ہے آپ پک اینڈ چوز کیوں کرتے ہیں؟میں کل پھر آؤں گا،جب تک بانی نہیں نکلیں گے ہم آتے رہیں گے جب بانی نکل گئے تو پھر آپ کو آپ کی اڈیالہ جیل مبارک ہو۔

انہوں ںے کہا کہ کیا یہ پاکستان صرف عمران خان کا ہے؟ کیا ملک ٹھیک کرنے کا ٹھیکہ صرف عمران خان نے لے رکھا یے؟ باقی کسی کی ذمہ داری نہیں؟ ہماری حکومتیں ختم کی گئیں تو پھر پاکستان کو آپ چلالیں، ہم توقع رکھتے ہیں عمران خان کو باہر آنے دیا جائے کیوں کہ عدالت میں ان کا کوئی کیس نہیں۔

انہوں نے کہا کہ ہم بھی صرف انصاف چاہتے ہیں کوئی فیور نہیں چاہتے، آپ نے پی ٹی آئی اور بانی کے خلاف سب کرکے دیکھ لیا لیکن آپ عوام سے نہیں جیت سکے، ملک چلانا ہے تو عمران خاں کو باہر لائیں قوم اس مذاق کو مزید برداشت نہیں کرے گی، فارم 47سے پاکستان نہیں چلنے والا۔