سنگھم اگین میں چلبل پانڈے کی انٹری، سلمان کا کیمیو رول ہٹ قرار

بالی ووڈ کی فرنچائز سنگھم اگین میں سپر اسٹار سلمان خان کا بطور مقبول کردار چلبل پانڈے کیمیو نے شائقین کے دل جیت لیے۔

روہت شیٹی کی ہدایتکاری میں بننے والی فلم سنگھم اگین جس کا مداحوں کو بےصبری سے انتظار تھا، ریلیز کر دی گئی ہے فلم کو شائقین کی جانب سے پسند کیا جارہا ہے اور اس کے خوب چرچے ہورہے ہیں۔

سنگھم اگین میں اجے دیوگن مرکزی کردار ادا کر رہے ہیں جبکہ ان کے ساتھ، اکشے کمار، کرینہ کپور خان، دیپیکا پڈوکون، سلمان خان، ٹائیگر شروف، جیکی شروف، ارجن کپور اور رنویر سنگھ بھی اداکاری کے جوہر دکھا رہے ہیں۔

ریلیز کے پہلے ہی دن سے کامیابی بزنس کرنے والی اس فلم میں مداحوں کو سلمان خان کا بطور چلبل پانڈے کیمیو رول بےحد پسند آیا ہے اور ان کے کیمیو کو ہٹ قرار دیا جارہا ہے۔

کامیڈی ایکشن اور ڈرامہ سے بھرپور یہ فلم دیوالی کے موقع پر ریلیز کی گئی ہے جس میں شائقین کے پسندیدہ کردار باجی راؤ سنگھم، سوریہ ونشی، چلبل پانڈے اور سمبا شامل ہیں جبکہ فلم میں اداکارہ دیپیکا پڈوکون کا پہلی مرتبہ بطور انسپیکٹر رول بھی مداحوں کی توجہ کا مرکز بنا ہوا ہے۔