ہانگ کانگ سپر سکسز؛ مسلسل 3 شکستوں کے بعد بھارتی ٹیم ایونٹ سے باہر

ہانگ کانگ ورلڈ سپر سکسز ٹورنامنٹ میں پاکستان کے ہاتھوں شکست خوردہ بھارتی ٹیم مسلسل تین میچز ہار کر ایونٹ سے باہر ہوگئی۔

مونگ کوک میں کھیلے گئے مقابلوں میں روبن اتھاپا کی کپتانی میں ایونٹ میں شرکت کرنیوالی بھارتی ٹیم کو گزشتہ روز روایتی حریف پاکستان نے عبرتناک شکست دی۔

آج ایونٹ میں بھارتی ٹیم کا پہلا مقابلہ متحدہ عرب امارات سے ہوا، جس نے سنسنی خیز مقابلے کے بعد بھارت کو ایک رن سے ہرایا، ہندوستان کو جیت کیلئے 130 رنز کا ہدف ملا تاہم بھارتی ٹیم محض 129 رنز بناکر ہمت ہار گئی۔

مزید پڑھیں: ہانگ کانگ سکسز؛ پاک بھارت کرکٹرز کی تصویر وائرل 

دوسرے میچ میں بھارت کو انگلینڈ کا چیلنج درپیش تھا تاہم اس میچ میں بھی یکطرفہ مقابلے کے بعد 15 رنز سے شکست کا منہ دیکھنا پڑا۔

مزید پڑھیں: ہانگ کانگ سپر سکسز؛ پاکستان نے بھارت کو ہرادیا

مسلسل تین میچز میں ناکامی کے بعد بھارتی ٹیم ایونٹ سے باہر ہوچکی ہے۔

دوسری جانب پاکستان آج کواٹر فائنل میں جنوبی افریقی ٹیم کے مدمقابل آئے گا۔