وفاقی کابینہ نے سروسز چیفس کی مدت ملازمت 5 سال اور ججز کی تعداد بڑھانے کی منظوری دے دی

وفاقی کابینہ نے سپریم کورٹ میں ججز کی تعداد 34 جبکہ اسلام آباد ہائیکورٹ میں بڑھا کر 12 کرنے اور سروسز چیفس کی مدت ملازمت 5 سال کرنے کی منظوری دے دی۔

ایکسپریس نیوز کو ذرائع سے ملنے والی اطلاع کے مطابق وزیراعظم کی زیر صدارت وفاقی کابینہ کے اجلاس میں سپریم کورٹ اور اسلام آباد ہائیکورٹ کے ججز کی تعداد بڑھانے کے حوالے سے گفتگو کی گئی۔

ذرائع کے مطابق کابینہ نے سپریم کورٹ کے ججز کی تعداد 34 جبکہ اسلام آباد ہائیکورٹ کے ججز کی تعداد بڑھا کر 12 کرنے کی منظوری دے دی۔

کابینہ کی منظوری کے بعد ججز کی تعداد میں اضافے کا بل پارلیمنٹ میں مںظوری کے لیے پیش کیا جائے گا۔

ذرائع کا کہنا ہے کہ وفاقی کابینہ کو ججوں کی تعدا د بڑھانے کی وجوہات پر بھی بریفنگ بھی دی گئی اور بتایا گیا کہ سپریم کورٹ و ہائی کورٹس میں آئینی بینچ بنائے جانے کے باعث ججوں کی تعداد بڑھائی جا رہی ہے۔

وفاقی کابینہ نے آرمی ایکٹ میں ترمیم کا بل بھی پارلیمنٹ میں پیش کرنے کی منظوری دیدی،آرمی ایکٹ میں ترمیم کے ذریعے تمام سروسز چیفس کی مدت بڑھا کر 5سال کرنے کی منظوری دے دی۔