پاور پروجیکٹ کیلیے ٹھٹھہ میں 1674 ایکڑ اراضی نجی کمپنی کو دینے کی منظوری

کراچی: سندھ کابینہ نے 250 میگا واٹ پاور پروجیکٹ کے لیے 1674 ایکڑ اراضی نجی کمپنی کو دینے کی منظوری دیدی۔

وزیراعلیٰ سندھ سید مراد علی شاہ کی زیر صدارت کابینہ کا اجلاس ہوا جس میں صوبائی وزراء، مشیر،چیف سیکریٹری ، چیئرمین پی اینڈ ڈی اور دیگر افسران شریک ہوئے۔

کابینہ نے 324.5 ملین روپے واٹر بورڈ کے بجلی کے بل مہیا کرنے والے فیڈر کو لو لوسز فیڈر پر منتقل کرنے کی منظوری دے دی جس کے بعد اب نئے فیڈرز پر واٹر بورڈ کے لئے لوڈشیڈنگ نہیں ہوگی۔

کابینہ نے ماحول کو بہتر بنانے کیلئے سندھ انوائرمینٹل پروٹیکشن کاؤنسل قائم کرنے کی منظوری دیدی جس میں 25 آفیشل اور نان آفیشل اراکین ہونگے۔

سندھ کابینہ نے ای-اسٹیمپ کی سروس کے لیے بورڈ آف ریوینیو اور پنجاب انفارمیشن ٹیکنالاجی بورڈ کے ساتھ معاہدے میں توسیع کی منظوری دیدی۔ چھ ماہ کے بعد سندھ حکومت کا آئی ٹی ڈپارٹمینٹ ای-اسٹیمپ کا سسٹم خود سنبھالے گا۔

کابینہ نے 250 میگا واٹ پاور پروجیکٹ کے لیے 1674 ایکڑ اراضی ایک نجی کمپنی کو ضلع ٹھٹو میں دینے کی منظوری بھی دیدی۔

اجلاس میں آئی بی اے سکھر کے پاس جاب پورٹل قائم کرنے کی منظوری بھی دی گئی۔ اس پورٹل پرسندھ حکومت کے نوکریوں کے اشتہار بھی ہونگے اور وہاں اپلائی بھی کیا جائے گا۔ جاب پورٹل تین ماہ میں فعال ہوجائے گا۔