لاہور؛ وائلڈلائف عملے نے نایاب جانوروں کی کھالیں برآمد کرکے ایک ملزم کو گرفتار کرلیا

لاہور سے انتہائی نایاب نسل کے جانوروں کی کھالیں برآمد کی گئی ہیں جنہیں غیرقانونی طور پر فروخت کیا جارہا تھا۔ 

ڈپٹی ڈائریکٹر وائلڈلائف لاہور ریجن ڈاکٹر غلام رسول کی سربراہی میں وائلڈلائف عملے نے 
پام سیویٹ، ریڈ فاکس ، الٹائی ویزل اور امریکن منک کی کھالیں برآمد کی ہیں۔ 

 ڈاکٹر غلام رسول نے بتایا کہ ان کھالوں کو حنوط کرکے ڈرائنگ روم میں سجاوٹ کے لیے رکھا جاتا ہے۔ یہ انتہائی نایاب جانور ہیں جن کا شکار ممنوع ہے۔

انہوں نے بتایا کہ ان جانوروں میں سے ایک جانور غیرملکی جبکہ تین مقامی طور پر پائے جاتے ہیں۔ ان کی کھال کی قیمت ہزاروں روپے بتائی جاتی ہے۔ 

وائلڈلائف حکام نے ایک شخص کو گرفتار کیا ہے اور اس سے مزید تفتیش کی جارہی ہے کہ اس نے ان جانوروں کی کھالیں کہاں سے خریدیں۔