چیمپئینز ٹرافی؛ شیڈول میں تاخیر کمرشل پارٹنرز میں بےچینی

انٹرنیشنل کرکٹ کونسل (آئی سی سی) کی جانب سے چیمپئینز ٹرافی کے شیڈول میں تاخیر کی وجہ سے کمرشل پارٹنرز میں بھی بےچینی بڑھنے لگی۔

میڈیا رپورٹس کے مطابق بھارتی ٹیم کے پاکستان آنے سے انکار کے بعد میزبانی کو لیکر انٹرنیشنل کرکٹ کونسل (آئی سی سی) چیمپئنز ٹرافی 2025 کے شیڈول اور وینیوز کے حتمی اعلان میں تاخیر کررہا ہے۔

آئی سی سی کے ملٹی نیشنل پارٹنرز اور ایونٹ سے جڑنے والے مقامی اسپانسرز اس تاخیر کی وجہ سے اپنی برانڈ ایکٹیویٹیز اور کمرشل پلانز ترتیب دینے میں مشکلات کا شکار ہیں جبکہ انٹرنیشنل کرکٹ کونسل نے اِن تمام ملٹی نیشنل کمپنیوں سے طویل مدتی کروڑوں ڈالرز کے معاہدے کر رکھے ہیں۔

مزید پڑھیں: چیمپئینز ٹرافی؛ میزبانی کے حوالے سے جنوبی افریقہ ہی لاعلم

ایونٹ کے شیڈول کی تاخیر کی وجہ سے برانڈ ویلیو پر اثر پڑریا ہے، جس کی وجہ سے اسپانسرز اور کمرشل پارٹنرز شکوک میں مبتلا ہیں۔

پاکستان میں چیمپئنز ٹرافی کے لیے بعض مقامی اسپانسرز بھی ایونٹ کے مختلف سلاٹس کیلئے بات چیت کررہے ہیں تاہم تاخیر کی وجہ سے وہ اپنے معاہدے حتمی شکل نہیں دے پا رہے۔

مزید پڑھیں: چیمپئینز ٹرافی؛ شیڈول میں تاخیر، براڈ کاسٹرز کو بڑے نقصان کا خدشہ

رپورٹس میں دعویٰ کیا گیا ہے کہ آئی سی سی 21 نومبر تک چیمپئینز ٹرافی کے شیڈول اور وینیوز سے متعلق اہم اعلان کرسکتا ہے۔

چیمپئینز ٹرافی میں پاکستان آنے سے بھارتی ٹیم کے انکار کے بعد حکومت کے سخت موقف پر بھارتی بورڈ شدید ناراض ہے جبکہ ہائبرڈ ماڈل سے چیئرمین پی سی بی کے انکار انہیں مزید پریشان کردیا ہے۔