کراچی؛ ملیر میں کیمیکل کے گودام میں آتشزدگی، لاکھوں کا سامان جل کر خاکستر ہوگیا
آگ عمارت کی نچلی منزل پر لگی تھی فیکٹری میں کیمیکل ہونے کے باعث آگ کی شدت میں اچانک اضافہ ہوگیا
ملیر لاسی پاڑا میں کیمیکل کے گودام میں آگ لگ گئی جس نے پوری عمارت کو اپنی لپیٹ میں لے لیا جس کے نتیجے میں لاکھوں روپے کا سامان جل کر خاکستر ہوگیا۔
تفصیلات کے مطابق ملیر معین آباد لاسی پاڑا کے قریب موجود کیمیکل کے گودام میں اچانک آگ بھڑک اٹھی جس نے دیکھتے ہی دیکھتے پوری عمارت کو اپنی لپیٹ میں لے لیا۔
فائر بریگیڈ اور ریسکیو 1122 نے موقع پر پہنچ کر چار گھنٹے کی محنت کے بعد آگ پر قابو پالیا، کیمیکل کے گودام میں آگ بجھانے کے لیے فوم کا استعمال بھی کیا گیا جبکہ آگ کے مقام کی بجلی بھی منقطع کردی گئی ۔
فائر فائٹرز کا کہنا ہے کہ آگ عمارت کی نچلی منزل پر لگی تھی فیکٹری میں کیمیکل ہونے کے باعث آگ کی شدت میں اچانک اضافہ ہوگیا جس کے بعد فائر بریگیڈ کی مزید گاڑیوں کو طلب کیا گیا اور چار گھنٹے بعد آگ پر قابو پالیا گیا۔