لاہور؛ ڈکیتی و راہزنی کی وارداتوں میں ملوث 2 رکنی متحرک گینگ گرفتار

معصوم شہریوں کو گن پوائنٹ پر لوٹنے والا 2 رکنی متحرک گینگ گرفتار کرلیا گیا۔ 

ترجمان پولیس کے مطابق ایس پی سول لائنز ڈاکٹر عبدالحنان نے 15 کی کال پر نوٹس لیا جس پر ایس ایچ او تھانہ اولڈ انارکلی نے پولیس ٹیم کے ہمراہ بروقت کارروائی کرتے ہوئے شہری سے گن پوائنٹ پر موٹر سائیکل  چھین کر فرار ہونے والے ملزمان کو گھیرا ڈال کر گرفتار کر لیا۔ 

ملزمان کے قبضے سے چوری شدہ 5 موٹر سائیکلیں ، پسٹل 30 بور اور گولیاں برآمد ہوئی ہیں، ملزمان کے خلاف تھانہ اولڈ انارکلی میں مقدمات درج کرکے  مزید تفتیش کے لیے حوالہ انویسٹی گیشن ونگ کر دیا گیا۔ 

ایس پی سول لائنز ڈاکٹر عبدالحنان نے  بروقت کارروائی اور ملزمان کی رنگے ہاتھوں گرفتاری پر ایس ایچ او تھانہ اولڈ انارکلی رضا ذاکر اور پولیس ٹیم کو شاباش دی۔

انہوں نے کہا کہ اسٹریٹ کرائم کو کنٹرول کرنا اولین ترجیح ہے، جرائم پیشہ افراد کے خلاف بلا امتیاز کارروائیاں جاری رہیں گی۔