جناح انٹرنیشنل ایئرپورٹ پرغیرملکی خاتون سےڈیڑھ کروڑ کی کوکین برآمد

اینٹی نارکوٹکس فورس نے جناح انٹرنیشنل ایئرپورٹ پرغیرملکی خاتون سے ایک کلو396 گرام کوکین برآمد کرلی۔

ترجمان اے این ایف کے مطابق کراچی ایئرپورٹ پر تعینات عملے نے کارروائی کے دوران برازیلین خاتون سے 1 کروڑ 39 لاکھ روپے سے زائد مالیت کی 1 کلو 396 گرام کوکین برآمد کرلی۔

ملزمہ غیر ملکی پرواز کے ذریعے برازیل سے کراچی پہنچی تھی،تلاشی لینے پر خاتون کے انڈرگارمنٹس سے کوکین برآمد کی گئی، ملزمہ نے منشیات مائع حالت میں پلاسٹک شاپرز میں ڈال کر انڈر گارمنٹس میں چھپائی ہوئی تھیں،ملزمہ کے خلاف انسداد منشیات ایکٹ کے تحت مقدمہ درج کر کے مزید تحقیقات کا آغاز کر دیا گیا ہے۔

ترجمان اے این ایف کے مطابق منشیات اسمگلنگ کے لیے جدید اور نت نئے طریقوں کا استعمال اے این ایف کے لیے کسی چیلنج سے کم نہیں،اس کے باوجود بھی اے این ایف منشیات اسمگلنگ کے خلاف پرعزم ہے۔