کراچی کے مختلف علاقوں میں سڑکوں کا تعمیراتی کام جاری ہے، میئر کراچی

میئر کراچی بیرسٹرمرتضیٰ وہاب نے کہا ہے کہ کراچی کے مختلف علاقوں میں سڑکوں کا تعمیراتی کام جاری ہے۔

شیریں جناح کالونی میں شاہراہ غالب نزد پی ایس او پیٹرول پمپ کیماڑی گیٹ نمبر 2 کے قریب سے سڑک کی استرکاری کی جا رہی ہے تاکہ علاقہ مکینوں کو سہولت فراہم کی جاسکے، یہ ہم سب کے بدلتے اور بہتر ہوتے شہر کراچی کے مناظر ہیں جو آج شہریوں کے سامنے ہیں اور اسی طرح آگے بھی جاری رہیں گے۔

انہوں نے کہا کہ کراچی کی رونقوں اور روشنیوں کو بلدیہ عظمیٰ بحال کررہی ہے اور شہر کے ہر ضلع میں کام ہوتا نظر آرہا ہے جو اس بات کی دلیل ہے کہ اگر نیت ٹھیک اور کام کرنے کا جذبہ ہو تو وسائل یا اختیارات کبھی رکاوٹ نہیں بنتے، کراچی میں جاری ترقیاتی کاموں کو بروقت اور جلد از جلد مکمل کرنے کی کوشش کی جا رہی ہے تاکہ شہریوں کو آمدورفت میں سہولت فراہم کی جاسکے۔

 شیریں جناح کالونی میں بھاری ٹریفک کی وجہ سے سڑکوں کی صورتحال تشویش ناک تھی اور ٹریفک جام کے مسائل کا سامنا تھا، کیماڑی گیٹ نمبر2 کے قریب کی خستہ حالت کے پیش نظر اس کی فوری مکمل اور استرکاری کا فیصلہ کیا گیا اور اس پر تیزی سے کام شروع کیا گیا اور اب جلد ہی اس مکمل کرلیا جائے گا۔

انہوں نے کہا کہ کراچی کے شہریوں کا وسیع تر مفاد ہماری اولین ترجیح ہے اور اس کے لیے تمام تر دستیاب وسائل بروئے کار لائے جا رہے ہیں۔