کراچی؛ مواچھ گوٹھ میں گھر یلو جھگڑے کے دوران بہنوئی کی فائرنگ سے سالا جاں بحق
اٹھائیس سالہ رفیق کو اس کے چچا زاد بھائی اصغر جو کہ مقتول کا بہنوئی بھی ہے اس نے قتل کیا، ایس ایچ او موچکو
فوٹو- فائل
موچکو کے علاقے مواچھ گوٹھ سپارکو روڈ کے قریب گھر کے اندر فائرنگ سے ایک شخص جاں بحق ہوگیا جس کی لاش ضابطے کی کارروائی کے لیے سول اسپتال پہنچائی گئی۔
ایس ایچ او موچکو بشیر ودھو نے بتایا کہ مقتول کی شناخت 28 سالہ رفیق کے نام سے کی گئی جسے اس کے چچا زاد بھائی اصغر جو کہ مقتول کا بہنوئی بھی ہے اس نے گھریلو جھگڑے کے دوران فائرنگ کر کے شدید زخمی کیا تھا۔
مضروب کو ایدھی ایمبولینس کے ذریعے اسپتال منتقل کیا جا رہا تھا کہ وہ زخموں کی تاب نہ لاتے ہوئے دم توڑ گیا جبکہ ملزم دیگر ساتھیوں کے ہمراہ موقع سے فرار ہوگیا جس کی تلاش جاری ہے۔
تاہم اس حوالے سے مقتول کے اہلخانہ سے مزید معلومات حاصل کی جا رہی ہیں۔