ڈی چوک احتجاج، ملزمان کو رات گئے پیش کرنے پر تفتیشی افسر کو شوز کاز نوٹس جاری

اسلام آباد کی انسداد دہشت گردی عدالت نے ڈی چوک احتجاج کے گرفتار ملزمان کو رات گئے پیش کرنے پر تفتیشی افسرکو نوٹس جاری کردیا۔

انسداد دہشتگردی عدالت اسلام آباد کے جج طاہر عباس سپرا کے روبرو ملزمان کو پیش کیا گیا۔ ڈی چوک سے گرفتار 19 ملزمان کو کل رات ساڑھے 10 بجے عدالت میں پیش کیا گیا۔

سیکریٹریٹ پولیس نے ملزمان کے 10 روز کے جسمانی ریمانڈ کی استدعا کی۔ عدالت نے ملزمان کا 4 روزہ جسمانی ریمانڈ منظور کر لیا۔ عدالتی حکم میں کہا گیا کہ ملزمان کو رات گئے پیش کیا گیا جبکہ کوئی بھی وکیل پیش نہ ہوسکا۔ ملزمان کو رات گئے عدالت میں پیش کرنے پر پولیس کے تفتیشی افسر کو نوٹس جاری کیا جاتا ہے۔