ہندو برادری سے تعلق رکھنے والی روپ متی سی ایس ایس کے امتحان میں کامیاب

عالمی شہرت یافتہ اور تمغہ امتیاز حاصل کرنے کا اعزاز رکھنے والے پاکستانی مصور چترا پریتم کی بیٹی روپ متی نے سی ایس ایس کا امتحان پاس کرلیا۔

تفصیلات کے مطابق پنجاب کی آخری تحصیل صادق آباد کے تاریخی قصبہ سنجرپور سے تعلق رکھنے والی روپ متی نے سی ایس ایس کے تحریری امتحان میں نمایاں کامیابی حاصل کی ہے۔

روپ متی ان دنوں فرانس میں موجود ہیں اور وہ نیوما بزنس یونیورسٹی فرانس سے اعلیٰ تعلیم کی ڈگری مکمل کر رہی ہیں۔ ہندو برادری سے تعلق رکھنے والی روپ متی اور اس کے خاندان کو اس شاندار کامیابی پر اقلیتی برادری کی جانب سے مبارکباد پیش کی جارہی ہے۔

روپ متی نے اس اپنی کامیابی پر خوشی کا اظہار کیا ہے اور والد چترا پریتم کی طرح اپنے ملک پاکستان کا نام بین الاقوامی سطح پر روشن کرنے کیلئے پرعزم ہیں۔