کسٹمز کی کھلے سمندر میں کارروائی، 39ہزار لیٹر ایرانی ڈیزل اسمگل کرنیکی کوشش ناکام

پاکستان کسٹمز انفورسمنٹ کی جانب سے انسداد اسمگلنگ مہم کے تحت کھلے سمندر میں تین مختلف کارروائیوں کے دوران ایرانی ڈیزل اسمگل کرنے کی کوشش ناکام بنا دی گئی۔

کلکٹر انفورسمنٹ معین الدین وانی کو موصول ہونے والی ایک خفیہ اطلاع پر کسٹمز انفورسمنٹ میرین کے ایڈیشنل کلکٹر باسط حسین اور اسسٹنٹ کلکٹر شہزاد علی کی سربراہی میں ایک ٹیم نے بحیرہ عرب میں تین مختلف کارروائیاں کیںْ

کامیاب کارروائیوں کے نتیجے میں الصدف، الرحمٰن اور الشیران نامی تین مختلف لانچوں کے ذریعے اسمگل ہونے والا 39ہزار لیٹر ایرانی ڈیزل برآمد کرکے ضبط کرلیا۔

ضبط شدہ ایرانی ڈیزل اے ایس او گودام میں منتقل کر دیا گیا ہے جبکہ ضبط ہونے والی تینوں لانچوں کو این ایم بی وہارف منتقل کر دیا گیا ہے۔

اس سلسلے میں مزید تحقیقات کی جاری ہیں تاکہ سمندری راستے لانچوں کے ذریعے ایرانی ڈیزل کے اسمگلروں کے منظم گروہ کا قلع قمع کیا جا سکے۔