کراچی؛ کثیرالمنزلہ عمارت کی بیسمنٹ میں آگ بھڑک اٹھی، تاحال قابو نہ پایا جاسکا

نارتھ ناظم آباد میں عمارت کے گراؤنڈ فلور پر قائم گارمنٹس دکان کی بیسمنٹ میں آگ بھڑک اٹھی جس نے دیکھتے ہی دیکھتے شدت اختیار کرلی، آتشزدگی کے دوران عمارت کے فلیٹوں کے مکین گھروں سے باہر نکل آئے جبکہ بیسمنٹ میں دھواں بھرنے سے امدادی کارروائیوں میں شدید مشکلات کا سامنا کرنا پڑا۔

 آگ کی اطلاع ملتے ہی ریسکیو 1122 اور کے ایم سی فائر بریگیڈ کا عملہ موقع پر پہنچ گیا اور آگ پر قابو پانے کی کوششیں شروع کر دیں جبکہ حیدری مارکیٹ پولیس کی نفری بھی موقع پر پہنچ گئی اور مذکورہ مقام کو اپنے گھیرے میں لیکر غیر متعلقہ افراد کو وہاں سے دور ہٹا دیا ، آتشزدگی کی اطلاع ملنے پر ڈی سی سینٹرل اور اسسٹنٹ کمشنر بھی موقع پر پہنچ گئے اور امدادی کارروائیوں کا جائزہ لیا جبکہ سخی حسن ہائیڈرنٹ پر بھی ایمرجنسی نافذ کر کے فائر بریگیڈ حکام کو واٹر ٹینکر کے ذریعے پانی فراہم کیا جاتا رہا۔

 ترجمان ریسکیو 1122 اور کے ایم سی فائر بریگیڈ حکام کے مطابق نارتھ ناظم آباد بلاک ایچ میں شاپنگ مال کے برابر میں قائم کثیرالمنزلہ رہائشی عمارت کے گراؤنڈ فلور پر قائم معروف گارمنٹس کمپنی کے آؤٹ لیٹ کی بیسمنٹ میں آگ لگنے کی اطلاع مغرب کے وقت ملی تھی جس پر ریسکیو کا عملہ فائر ٹینڈرز اور ایمبولینس کے ہمراہ موقع پر پہنچ گیا اور آگ پر قابو پانے کی کوششیں شروع کر دیں۔

 بیسمنٹ میں لگنے والی آگ کے باعث دھواں بھرنے کی وجہ سے امدادی کارروائیوں میں عملے کو شدید مشکلات کا سامنا کرنا پڑا جبکہ دھویں کے اخراج کے لیے ہیوی ایگزسٹ فین کی مدد سے دھویں کو نکالا جا رہا ہے،آگ پر قابو پانے کے لیے مجموعی طور پر 8 فائر ٹینڈز اور اسنار کل موقع پر موجود تھی جبکہ بیسمنٹ میں راستہ بنانے کے لیے شاول کو بھی طلب کرلیا گیا تھا۔

 13 منزلہ رہائشی عمارت میں 2 منزلیں پارکنگ کے لیے اور بیسمنٹ میں گارمنٹس کمپنی کا گودام بتایا جاتا ہے ، آخری اطلاعات آنے تک گارمنٹس کمپنی کی دکان کے بیسمنٹ میں شام 6 بجے کے قریب لگنے والی آگ پر رات سوا گیارہ بجے تک قابو پانے کی کوششیں جاری تھیں ۔